Mister na wanted sa rape, sexual assault sa Valenzuela, laglag sa selda

SA kulungan ang bagsak ng isang mister na wanted sa kaso ng rape at sexual assault matapos matimbog ng pulisya sa ikinasang manhunt operation sa Valenzuela City.

Lumabas sa ulat ni Valenzuela Police Acting Chief P/Col. Joseph Talento, ang 45-anyos na akusado na kabilang sa mga Most Wanted Person ng Valenzuela CPS ay may nakabinbin na warrant of arrest na inisyu ng Family Trial Court, Branch 16, Valenzuela City.

Nang makatanggap sila ng impormasyon hinggil sa tinutuluyan bahay ng akusado, kaagad bumuo ng team ang mga operatiba ng Warrant and Subpoena Section (WSS) Valenzuela CPS bago ikinasa ang manhunt operation.

Dakong alas-4:40 ng hapon nang makorner ng mga tauhan ni Col. Talento ang akusado sa Bitik Medina Street, Community Steelwood, Barangay Gen. T. De Leon.

Maayos naman umanong naisilbi sa akusado ang warrant of arrest para sa dalawang bilang ng Rape at dalawang bilang din ng Sexual Assault in relation to Section 5 ng R.A 7610 o ang Special Protection of Children Against Abuse, Exploitation and Discrimination Act na walang inirekomendang piyansa.

Dinala ang akusado sa Valenzuela City Health Department para sa medical examination bago tinurnover sa Custodial Facility Unit ng Valenzuela CPS kung saan siya pansamantalang nakapiit habang hinihintay ang pagpapalabas ng commitment order mula sa korte.
(Richard Mesa)