Mga pinauwing Pinoy crew ng Japan cruise, hindi mawawalan ng trabaho: DOLE

Walang Pinoy crew ng MV Diamond Princess ang mawawalan ng trabaho.

Ito ang tiniyak ni Labor Secretary Silvestre Bello III sa mga pinauwing mga Pinoy mula sa nasabing cruise sa Japan na sasailalim naman sa 14 days quarantine sa New Clark City sa Tarlac. Ayon sa kalihim, agad na ihahanda ang kanilang redeployment sa sandaling matapos ang kanilang quarantine.

Aniya, kailangan lamang na sumailalim muna ang mga Pinoy crew sa quarantine lalo pa at maraming naitalang kaso ng Coronavirus Disease o COVID-19 sa cruise ship.

Nakausap na rin ng DOLE ang Magsaysay Maritime Corporation kung saan siniguro naman ng manning agency na makakasampa muli sa barko ang mga na-repatriate na crew.

Sinabi rin ng kalihim na ang mga Pinoy crew ay mapagka-kalooban naman sila ng P10,000 cash aid sa bawat isa.
Kinumpirma ni Bello na sa 538 Pinoy crew ay nasa 80 lamang ang nagpaiwan sa MV Diamond Princess.