Mga guro sa Caloocan, may P2K monthly augmentation pay

MASIGLANG sinalubong ang 2025 ng mga guro ng pampublikong paaralan sa Lungsod ng Caloocan nang ipatupad ng pamahalaang lungsod ang Php 2,000 buwanang augmentation pay simula na unang ipinangako ni Mayor Dale Gonzalo “Along” Malapitan sa kanyang State of ang City Address (SOCA) noong Setyembre 2024.

Ang nasabing augmentation pay ay allowance na ibinibigay ng isang local government unit (LGU) sa mga gurong nakatalaga sa kanilang nasasakupan, na inuna ni Mayor Along na dagdagan sa kanyang termino bilang pagpapahalaga sa mahahalagang kontribusyon ng mga local faculty member sa sistema ng edukasyon sa lungsod.

“Sa ating mga huwaran at maaasahang guro sa Caloocan, ito po ang pagtupad ko sa aking ipinangako na gawing Php 2,000 ang inyong augmentation pay bilang pagpapakita ng ating pagpapahalaga at pangangalaga sa bawat isa sa inyo,” aniya.

Ipinahayag din ng alkalde ang patuloy na pagtutok ng pamahalaang lungsod sa pagpapanatili ng kalidad ng edukasyon sa lahat ng aspeto at nanawagan ng suporta sa lahat ng stakeholders upang matiyak ang maayos na paghahatid ng lahat ng serbisyo.

“Sa mga guro, kasama na ang mga school administrator, at lalo na sa ating mga magulang, nawa’y patuloy namin kayong maging kaagapay sa pagbibigay ng maayos at de-kalidad na edukasyon para sa ating mga anak,” ni Mayop Along.

“Isa pong magandang salubong para sa Bagong Taon ang programang ito, at tinitiyak ko na tuloy-tuloy pa rin ang pagpapaunlad natin ng ating mga serbisyo para sa magandang kinabukasan ng mga Batang Kankaloo,” dagdag niya. (Richard Mesa)