MGA GRUPO NG TRANSPORTASYON, NANAWAGAN SA LTFRB NA APRUBAHAN ANG KARAGDAGANG ₱1 PROVISIONAL NA DAGDAG SA PASAHE

MARIING nanawagan ang mga pangunahing grupo ng transportasyon sa Land Transportation Franchising and Regulatory Board (LTFRB) na aprubahan ang karagdagang ₱1 provisional na dagdag sa pamasahe para sa unang apat na kilometro ng biyahe sa jeep. Layunin ng panawagang ito na maibsan ang epekto ng patuloy na pagtaas ng presyo ng krudo, piyesa, at gastusin sa pagpapanatili ng mga pampasaherong jeep.

Ayon kay Ramon Guevarra, Pangulo ng Jaen Nueva Ecija Transport Corporation, kinakailangan na ang dagdag-pamasahe bunsod ng tuloy-tuloy na pagtaas ng gastusin sa maintenance upang matiyak ang kaligtasan at kaayusan ng mga jeep sa kalsada.

Kabilang sa mga gastusing ito ang mga piyesa, baterya, at maging ang mga gulong.

Sinang-ayunan ni Melencio “Boy” Vargas, Pangulo ng Alliance of Transport Operators and Drivers Association of the Philippines (ALTODAP), ang panawagan at binigyang-diin ang parehong dahilan. Ang ALTODAP ay isa sa mga grupong naghain ng petisyon para sa dagdag-pamasahe noong Agosto ng kasalukuyang taon.

Sa kanilang petisyon, hiniling ng ALTODAP sa LTFRB na gawing permanente ang ₱1 provisional na dagdag na inaprubahan noong Oktubre 2023, at aprubahan ang isa pang provisional na dagdag upang maibsan ang pagkalugi ng mga operator at tsuper dulot ng pagtaas ng presyo ng krudo at maintenance.

Sa kasalukuyan, ang minimum na pamasahe sa tradisyunal na jeep ay ₱13 para sa unang apat na kilometro, habang ₱15 naman sa modernong jeep.

Kapag inaprubahan ng LTFRB ang karagdagang provisional na dagdag, magiging ₱14 ang pamasahe sa tradisyunal na jeep at ₱16 sa modernong jeep.

Binigyang-diin nina Guevarra at Vargas na kinakailangan na ang dagdag-pamasahe sa panahong ito, lalo’t ang huling pag-apruba ng LTFRB ay noong Oktubre 2023 pa.

Dahil sa implasyon at iba pang salik na nagpapataas ng presyo ng mga pangunahing bilihin, iginiit ng dalawang lider ng transportasyon na mahalaga ang tulong ng pamahalaan sa anyo ng dagdag-pamasahe para sa mga tsuper at operator. (PAUL JOHN REYES)