Mga bayolenteng tao na nasa rally, mga kriminal, hindi protesters – Malakanyang

MARIING kinondena ng Malakanyang ang marahas na aksyon na ginawa ng tinawag nitong mga “kriminal” sa pag-hijack sa mapayapang anti-corruption protests, araw ng Linggo.

Sa katunayan, inatasan ni Pangulong Ferdinand R. Marcos Jr. si Interior Secretary Jonvic Remulla na payapain ang ‘barbarong aksyon’ lalo na iyong ginawa sa labas ng Malacañang complex sa Manila, sa pamamagitan ng pag-aresto sa lahat ng mga nanggulo.

Dahil dito, inilarawan ni Presidential Communications Office Undersecretary at Palace Press Officer Claire Castro ang mga nasa likod ng karahasan na “not to be protesters, but outlaws (tulisan).”

“It’s very clear that they have no other intention but to discredit the government. It seems they want to bring the government down. They are definitely doing a crime,” ang sinabi ni Castro.

Sa kabila ng naging kautusan sa kapulisan na ‘to keep maximum tolerance’ nanaig pa rin ang karahasan sa dalawang lugar sa labas ng Malakanyang.

Ang mga naka-maskarang indibidwal na nakasuot ng itim na t-shirt ay natangkang itulak ang anti-riot police na nagbabantay sa daan patungong Palasyo ng Malakanyang, bago batuhin ng bato at sunugin ang trailer truck na naka-park sa paanan ng Ayala Bridge.

Naghagis ng bato ang mga nakamaskarang indibiduwal kung saan isa sa tinamaan ay ang dzBB broadcast journalist na si Manny Vargas.

Sa ngayon, hindi pa ma-establish ng kapulisan ang affiliation ng mga tao, may 20 ang nasakote kabilang ang tatlong menor de edad matapos ang gulo.

May ilang indibiduwal ang may dalang watawat na na may “One Piece” Straw Hat Jolly Roger, o isang skull-and-crossbones symbol, nakasuot ng isang straw hat mula sa popular Japanese media.

Nasugatan din si Renato Reyes Jr., pangulo ng activist group Bagong Alyansang Makabayan (Bayan), tinamaan ng bato sa mukha, habang tinatapos na ng grupo ang rally sa Mendiola.

Sinabi ni Reyes na hindi niya alam ang affiliation ng violent protesters na nakitang nambato ng bato at molotov cocktails, at sinira ang public property, kabilang na ang street light. Subalit kinumpirma nito na hindi sila mula sa Bayan.

Tinatayang may 30 police officers ang nasugatan habang nangyayari ang marahas na komprontasyon.  (Daris Jose)