Mexican pinatulog ni Magsayo sa 10th round

Nagpasiklab din si Pinoy champion Mark Magsayo nang angkinin nito ang matikas na 10th round knockout win kay Mexican fighter Julio Ceja kahapon sa T-Mobile Arena sa Las Vegas, Nevada.

Inilatag ni Magsayo ang solidong right shot na kumunekta sa panga ni Ceja para matamis na makuha ang knockout win.

“Tumutok ako sa straight punches. Kada round yun ang ginagawa ko. Nung nakita ko na nasaktan ko na siya, hindi na ako tumigil,” ani Magsayo.

Umingay ng husto ang buong T-Mobile Arena dahil sa malalakas na hiyawan ng mga Pinoy fans na personal na nakapanood ng laban bitbit ang kani-kanyang bandila ng Pilipinas.

Napanatili ni Magsayo ang World Boxing Council-Asian Boxing Council feat­herweight title gayundin ang malinis na rekord ng Pinoy champion tangan ang 23-0 marka kabilang ang 16 knockouts. Nahulog naman si Ceja sa 32-5-1 baraha.