Mayor Jeannie, binisita ang inabandonang sanggol

PERSONAL na bumisita si Mayor Jeannie Sandoval sa San Lorenzo Ruiz General Hospital para tingnan ang kalagayan ng isang sanggol na lalaki na nailigtas matapos matagpuang inabandona sa isang pulang eco bag sa kahabaan ng Santos Road, McArthur Highway, Barangay Potrero noong Disyembre 23, 2024.

“Bilang Ina ng Lungsod ng Malabon, labis po nating ikinalulungkot ang nangyaring ito. Naniniwala po tayo na bawat bata ay may karapatang mabuhay, mabigyan ng tamang kalinga at paggabay. Sa kabila ng insidenteng ito, agad tayong gumawa ng mga paraan upang masiguro ang kaligtasan ng sanggol. Nawa ay lumaki ka bilang isang malusog at mabait na bata,” ani Mayora.

Sa ulat ng City Social Welfare and Development Department (CSWDD), na-diagnose bilang isang katamtamang preterm na may mababang timbang ang sanggol na inilipat sa Reception and Study Center for Children (RSCC) sa Quezon City matapos magamot sa San Lorenzo Ruiz General Hospital. Sa RSCC, ang sanggol ay tatanggap ng komprehensibong suporta sa pangangalagang medikal, nutrisyon, sikolohiya, at mga serbisyong panlipunan.

Nakipag-ugnayan ang CSWDD sa iba’t ibang ahensya, kabilang ang Malabon City Police Station, San Lorenzo Ruiz General Hospital, Malabon Disaster Risk Reduction and Management Office, Ospital ng Malabon, City Health Department, Local Civil Registry, at Potrero Barangay Council for Protection of Children, upang matiyak kaligtasan, seguridad, at kapakanan ng sanggol.

Sinabi nito na nagbigay ng medical intervention ang staff ng San Lorenzo Ruiz para matiyak na nasa stable condition ang sanggol. Dinagdagan din ang mga barangay health worker bilang tagabantay ng pasyente at nagpadala ang CSWDD ng mga nursing aides mula sa mga shelter na pinamamahalaan ng lokal na pamahalaan upang magsilbing tagabantay ng pasyente.

Bukod sa gamot at gatas ng ina (mula sa City Health Department at Ospital ng Malabon’s milk bank), nagbigay sa sanggol ang mga magulang ng iba pang sanggol sa ospital ng mga damit, gatas, at iba pang gamit para sa kanyang pangangailangan.

Ang Local Civil Registry at ang CSWDD ng lungsod ay nagproseso ng mga kinakailangang dokumento sa paglipat ng sanggol sa RSCC para matugunan ang kanyang mga pangangailangan.

Lumabas sa imbestigasyon na ang sanggol ay natagpuan ng isang concerned citizen sa kahabaan ng Santos Road McArthur Highway bandang alas-6:40 ng umaga na nakabalot ng itim na sando.

“Patuloy po nating tutukan ang insidenteng ito upang masiguro ang maayos na paglaki ng bata. Dito sa ating Lungsod, prayoridad natin ang kaginhawaan at kaayusan ng buhay ng bawat residente, ano man ang edad. Nandito ang pamahalaang lungsod upang umalalay sa kanya,” pahayag naman ni City Administrator Dr. Alexander Rosete. (Richard Mesa)