Marcial sasamahan ang Philippine boxing team

Balik Pilipinas na si Eumir Marcial upang makasama ang national boxing team sa paghahanda para sa Tokyo Olympics na idaraos eksaktong tatlong buwan mula ngayon.

Kasamang bumalik ng Pilipinas ni Marcial sina reigning International Boxing Federation (IBF) super flyweight champion Jerwin Ancajas.

Bilang bahagi ng health protocols, sumasailalim pa sina Marcial at Ancajas sa 14 day quarantine period bago tuluyang makasa-lamuha ang mga mahal nila sa buhay.

Sinariwa ni Marcial ang ilang buwang training nito sa Amerika na itinuturing nitong malaking tulong sa kanyang tangkang masungkit ang gintong medalya sa Tokyo Olympics.

Nakasama ni Marcial sa training sa Los Angeles, California sina Hall of Famer Freddie Roach at strength and conditioning expert Justin Fortune.