Mala-hotel na bilangguan sa Mindoro… BucorTel raket ni Gen. Catapang, buking!

MALA- hotel na pasilidad sa loob ng BuCor na pinapaupahan kada araw umano ni General Catapang sa High Value Chinese Prisoners, nabuking.

Tuluy tuloy ang pamamayagpag ng mga maimpluwensiyang bilanggong foreigners na karamihan ay napapabilang na Chinese nationals dahil sa mala-hotel na bilangguan sa Sablayan Prison and Penal Farm (SPPF), Occidental Mindoro.

Ito ay dahil sa pagpapahintulot daw ni Bureau of Corrections (BuCor) Director General Gregorio Pio Catapang kung saan diumano’y may tinatanggap na bayad mula sa mga foreigners na gustong gumamit ng pasilidad.

Napag-alamang nangyayari ang pagha-hari-harian ng mga dayuhang bilanggo simula sa termino ni Catapang kung saan lakas loob na ginagawa ng naturang opisyal na ginagamit madalas ang pangalan ng kanyang kaibigang si dating DOJ Secretary Crispin Boying Remulla na ngayo’y kasalukuyang Ombudsman kaya’t malakas ang loob dahil ka brad pala niya ito. Totoo ba yan Mr. Ombudsman Boying? Ito ang katanungan ng marami na dapat liwanagin.

Tuluy tuloy daw ang kitaan sa loob ng mga bilangguan sa BuCor at ginagawang source of income na. Malaki raw bayad kada unit ng mala -VIP sa loob ng compound ng BuCor sa Sablayan.

Mayroong isang gusali na may tinatayang sampung kuwarto na pang VIP para lamang sa mga nakukulong mula sa Chinese community kung saan nagpapapasok pa di umano ng mga chicks na animo’y motel ang nasabing bilangguan imbes na doon pagdusahan ang kanilang mga kasalanan ay puro pagpapasarap pala ang ginagawa ng mga bilanggo.

Bukod pa rito, natuklasan pang may visiting area na pinapatakbo mismo ng Chinese community sa loob ng BuCor imbes na ang pamahalaan ang nagpapatakbo.

Ang sabi nga ng kaibigan natin sa loob ng BuCor lahat ng gusto mo kahit kontrabando iyan kayang ipalusot at gawing legal basta idaan lamang sa Deed of Donation para pasok pa rin sa loob ng bilangguan para maging legal.

Kaya naman nagmistulang inilipat lamang ang mga sinira noon na marangyang mga kubol mula dati sa New Bilibid Prison patungo sa jail compound ng BuCor ng probinsya ng Occidental Mindoro.

Nabatid pa natin sa isang BuCor official na tumanggi muna mapangalanan na may ilang high profile na bilanggo na karamihan ay Intsik ang nilipat na dyan sa nabanggit na bilangguan, magkano kaya ang kitaan per night sa VIP rooms ng BuCor sa Sablayan.
Samantala, sumabit din si Catapang sa mga lumutang kamakailan na 18 ex-marines na nagbuking na may male-maletang pera ang nire-remit kay dating congressman Zaldy Co. Kung saan may nag-deliver daw at tinanggap ni Catapang sa basement na paradahan sa Shangri-la Hotel, BGC ang male-maletang pera base na rin sa inilabas na joint affidavit ng mga dating marines.
Dagdag pa, sangkot din daw itong si Catapang sa mga ghost projects. Ibinulong kamakailan ng isa pang opisyal ng BuCor na itago na lang muna natin sa pangalang Mr. C na meron din ghost project si Catapang na pinagkakitaan ang isang proyektong gusali para maging kulungan subalit hanggang ngayon ay nganga pa rin at hindi ipinatupad kahit na pinondohan na ito ng gobyerno. Fully paid na diumano ang contractor pero poste pa lang ang naitatayo. (Bukas ang pahina ng People’s Balita para tumugon ang tauhan ng BuCor partikular na si Gen. Catapang sa lahat ng akusasyong ito. (PJR)