Mahilig manood ng horror, kaya happy na maging zombie: CARLA, nagkuwento ng totoong horror story ng buhay niya

MASAYA ang Councilor ng 5th District ng Quezon City na si Alfred Vargas dahil balik siya sa acting.

Mapapanood siya sa pilot week ng bagong GMA Afternoon Prime na “Unica Hija”, special participation lang daw siya bilang tatay ni Kate Valdez.

Pero sabi ni Alfred, nag-enjoy raw siyang talaga sa taping kaya natatawang sabi niya, parang gusto nga raw niyang magtuloy-tuloy na. Pero imposible dahil may kasunod na agad siyang ginagawa ngayon, ang “Arabella” kunsaan, mapapanood siya sa buong serye.

Matutuwa si Kate dahil parang naging instant fan niya si Alfred. Puring-puri ni Alfred si Kate. Sabi nito, “Alam niyo, ang galing niya ha. Ang galing niyang artista.

“And considering na ang bata pa niya, kaya siguradong ang layo ng mararating niya.”

Ang ganda ng katawan ni Alfred ngayon. Mas bumata rin ang looks niya. Nagbunga talaga ang disiplina niya sa pag-intermittent fasting at pagdyi-gym. Sumakto rin sa pagbabalik niya sa telebisyon.

Malaking bagay rin na kumpara noong nasa Congress siya, mas maluwag daw ang oras ngayon bilang Konsehal.

At sabi pa ni Alfred, “malaki rin ang pasasalamat ko sa GMA dahil very supportive rin sila. Naiintindihan din nil yung schedule ko kaya nababalanse.”

***

NATUPAD ang isa sa dream ng Kapuso actress na si Carla Abellana sa Halloween episode ng “Daig Kayo ng Lola Ko” ngayong Linggo.

May pagka-“All of Us Are Dead” ang peg kunsaan, nagampanan nila ang maging zombie.

Aminado si Carla na breather for her ang ginawang episode na very rare lang siyang makapag-horror sa mga drama na ginagawa niya.

Sey nga niya, “Sobrang na-excite po ako kasi sa wakas, no’ng nabasa ko pa lang ang word na zombies, sobrang na-excite na po ako. Napakalaking fan ko po ng horror, marami pong may alam diyan.”

Pero kahit mahilig sa horror, aminado itong matatakutin din habang nanonood.

Tinanong namin si Carla since alam ng lahat na marami siyang pinagdaanan sa totoong buhay at kung ano ang pinaka-horror story ng buhay niya.

“Actually marami po, marami… kung saan ako lumaking bahay, sa lola ko, very old. Naging parte na siya ng childhood ko.

“Siguro yung isa sa pinaka-nakakatakot, madaling-araw, nagising ako sa may window na may umiiyak. Alam ko naman ang asong umiiyak. Hindi siya aso o pusa, maliit na boses na umiiyak. ‘Yun talaga ang pinaka-nakatatakot.”

Sa isang banda, puro mga bagets ang kasama ni Carla sa cast tulad nina Cassy Legaspi, Matt Lozano, Will Ashley, Luis Hontiveros at Althea Ablan.

All praises si Carla sa mga co-stars niya na super ang gagaling daw.

(ROSE GARCIA)