LTO, nag-deploy ng maraming enforcers sa pagtatapos ng holiday break para sa kaligtasan ng publiko

NANAWAGAN si Land Transportation Office (LTO) Chief, Assistant Secretary Atty. Vigor D. Mendoza II sa mga motorista na magdoble-ingat sa kalsada, lalo na’t inaasahang marami ang babiyahe pabalik sa kanilang trabaho at paaralan sa pagtatapos ng mahabang Holiday break ngayong weekend.

Ayon kay Assec Mendoza, inatasan na niya ang lahat ng Regional Directors at mga pinuno ng iba pang opisina ng LTO na tiyakin ang presensya ng mas maraming enforcers sa kalsada upang tumulong sa pamamahala ng trapiko at pagpapatupad ng mga batas trapiko para sa kaligtasan ng publiko.

“Ang ating mga tauhan, sa pakikipag-ugnayan sa iba pang ahensya ng gobyerno, ay nasa lansangan upang tulungan ang ating mga kababayan sa kanilang pagbiyahe pabalik sa Metro Manila at iba pang urban areas sa pagtatapos ng mahabang Holiday break,” ani Assec Mendoza.

“Inaasahan natin ang mataas na volume ng mga sasakyan sa mga kalsadang patungo sa Metro Manila at iba pang urban areas kaya’t kailangang maramdaman ang ating presensya upang masiguro ang kaligtasan ng lahat ng bumibiyahe,” dagdag niya.

Ayon sa ulat ng Department of Health (DOH), mahigit 500 na aksidente sa kalsada ang naitala mula sa pagsisimula ng Christmas break, kung saan higit sa anim na tao ang kumpirmadong nasawi.

Noong nakaraang buwan, iniutos din ni Assec Mendoza ang mas pinaigting na kampanya para sa kaligtasan sa kalsada, kabilang na ang mas agresibong operasyon laban sa mga trak na lumalabag sa mga regulasyon tulad ng overloading at paggamit ng mga sirang gulong.

Mahigit 25 may-ari ng trak ang nabigyan na ng show cause orders dahil sa mga operasyong karaniwang isinasagawa mula gabi hanggang madaling araw sa mga regular na ruta ng trak sa Metro Manila at iba pang lugar.

“Ang ating agresibong kampanya para gawing ligtas ang lahat ng ating kalsada ay bahagi ng adbokasiya para sa kaligtasan sa kalsada ni DOTr Secretary Jaime J. Bautista, gayundin ng sariling kampanya ng ahensya na Stop Road Crash,” ani Assec Mendoza.

“Ngunit habang agresibo ang ating kampanya at operasyon para sa kaligtasan sa kalsada, nananawagan tayo sa lahat ng motorista na makiisa sa pamamagitan ng pagsunod sa mga kinakailangang hakbang para sa kaligtasan at pagsunod sa lahat ng regulasyon hindi lamang para sa kanilang kaligtasan kundi pati na rin ng lahat ng gumagamit ng kalsada,” dagdag pa niya.

Tiniyak din ni Assec Mendoza na sapat ang bilang ng mga tauhan sa mga pangunahing lansangan upang tumulong sa mga motorista sa kanilang biyahe patungo sa kanilang mga trabaho, partikular na sa Metro Manila.

Pinaalalahanan din niya ang mga motorista na tiyaking maayos ang kondisyon ng kanilang sasakyan, na ang driver ay hindi dapat nasa ilalim ng impluwensya ng alak o ilegal na droga, at may sapat na pahinga bago bumiyahe. (PAUL JOHN REYES)