LTO: E-bikes, e-trikes ipagbabawal na sa mga pangunahing lansangan

SISIMULAN ngayong Lunes, December 1, ang pagbabawal sa mga e-bikes at e-trikes na dumaan sa mga pangunahing lansangan sa bansa kasabay ang gagawing information dissemination tungkol sa bagong batas na ito.

Ito ay ayon sa isang pahayag ni Senator JV Ejercito na siyang designated budget sponsor ng Department of Transportation (DOTr) sa isang budget hearing kung saan binigyan diin naman ni LTO assistant secretary Martine Lacanilao ang nasabing bagong kautusan.

Ang mga mahuhuli na lumabag sa pinag-uutos ng LTO ay kukunin ang unit at i-impound ito automatically.

“According to LTO and DOTr, automatic impound because … it’s really a dilemma. Sometimes the drivers are not really licensed, sometimes it’s the mothers who are driving carrying their children. It’s dangerous. So, the LTO said that they will impound them automatically, especially when on main thoroughfares,” wika ni Ejercito.

Magkakaroon muna ng information drive ang DOTr at LTO na sisimulan din ngayon Lunes hinggil sa bagong kautusan na ipagbabawal na ang mga e-bikes at e-trikes sa mga pangunahing lansangan sa bansa. Bibigyan muna pagkakataon malaman ng mga tao ang tungkol dito bago pa manghuli ang LTO.

“DOTr Secretary Lopez said that by December 1 that they will first do an information drive, go around, and inform everyone about it. So, they will first give everyone a chance to know, through an information campaign, before they apprehend. They will give a warning first,” dagdag ni Ejercito.

Sinabi rin ni Senator Raffy Tulfo sa nasabing budget hearing na may reklamo siyang nakukuha na ang mga e-bikes at e-trikes ay ang mga bagong “king of the road” sa mga lansangan ngayon at pinalitan na ang mga jeepneys.

Saad pa ni Tulfo na hindi naman siya tutol sa operasyon ng mga ito dahil alam niya na ito ay isa sa mga pinagkukunan ng ikinabubuhay ng mga tao subalit kanyang nakita na ang karamihan sa mga ito ay siyang nagiging sanhi ng aksidente sa lansangan.

Sinabi naman ni Ejercito na ang LTO ay makikipagpulong sa Department of Interior and Local Government (DILG) at mga lokal na pamahalaan upang pag-usapan kung paano ang gagawin nila upang bigyan ng solusyon ang nasabing problema.

Magkakaroon din ng konsultasyon ang DOTr sa mga stakeholders tungkol sa kaligtasan, pagrerehistro at pagbibigay ng license sa mga drivers ng mga e-bikes at e-trikes.

“They really won’t be allowed on main thoroughfares. Maybe, we will give leeway when they are inside a barangay or subdivisions. But, they really will not be allowed anymore on major thoroughfares,” ayon pa rin kay Ejercito. LASACMAR