LIBRENG SAKAY SA MGA TRICYCLE, IPATUTUPAD SA CALOOCAN

NAKATAKDANG ipatupad ng Pamahalaang Lungsod ng Caloocan ang programang “Libreng Sakay” simula sa Abril 6, katuwang ang mga asosasyon ng mga tricycle para magbigay ng libreng biyahe sa mga commuter.

Ang “Libreng Sakay” ay magagamit sa oras ng traffic rush hour, mula 7:00am hanggang 9:00am at 5:00pm hanggang 7:00pm, kung saan ang mga kalahok na Tricycle Operators and Drivers Associations (TODA) ay makakatanggap ng Php 695 para sa dalawang oras na serbisyo kada araw.

Idineklara ni Mayor Dale Gonzalo “Along” Malapitan ang buong suporta ng pamahalaang lungsod na magbigay ng tulong sa mga lokal na pampublikong transportasyon at tiniyak na ang mga karagdagang programa ay dapat ipatutupad bilang pag-asa sa karagdagang pagtaas ng presyo ng gasolina.

“Nais natin na tulungan ang sektor ng transportasyon at maging ang mga mananakay. Naglaan na po tayo ng pondo upang mabigyan sila ng insentibo na makakatulong sa kanilang hanapbuhay kasabay ng pagbibigay ng libreng serbisyo para sa mga kababayan nating commuter,” ani Mayor Along.

“Alam ko po na malaking pagsubok sa ating lahat ang pagtaas ng presyo ng langis dahil hindi lang po transportasyon ang apektado kundi pati na rin ang presyo ng mga pangunahing pangangailangan, kaya naman makakaasa po kayo na nakalatag na po ang iba pang programa upang tugunan ang kasalukuyang krisis at paghandaan pa ang ibang mga posibilidad,” dagdag niya.

Bukod sa Libreng Sakay, ang pamahalaang lungsod ay nakatakdang magpatupad ng hiwalay na libreng programa sa transportasyon kasama ang mga jeepney organization. (Richard Mesa)