Libo-libong seafarer, nanganganib mawalan ng trabaho

Nanganganib na mawalan ng trabaho ang libo-libong seafarer matapos madiskubre na 61 maritime school sa bansa ay bigong sumunod sa itinakdang regulasyon ng Standards of Training, Certification and Watchkeeping for Seafarers (STCW) convention.

Natuklasan ito sa pakikipagpulong ni Marino Party-list First Rep. Sandro Gonzalez sa Maritime Industry Authority (MARINA) kung saa’y sa report ng naturang tanggapan ay nakasaad na 61 mula sa kabuuang 91 maritime schools sa bansa ang inirekomendang ipasara.

Dahil ito sa pagiging non-compliance sa itinakdang standards ng STCW convention na sumasaklaw sa maritime education, training at certification.

Ayon sa kongresista, ang Pilipinas ay kasalukuyang isinailalim sa audit ng European Maritime Safety Agency (EMSA) para sa STCW compliance at oras na ito’y madiskubre, tiyak malalagay sa panganib ang trabaho ng libo-libong seafarer dahil maaring hindi na kilalanin at tanggapin ng European Union ang certificate ng Filipino seafarer.

Naniniwala si Gonzalez na ang Commission on Higher Education at MARINA ang may responsibilidad sa mga maritime school alinsunod sa Executive Order No. 63, Series of 2018.

Dahil dito, magpapatawag ng imbestigasyon si Gonzalez ukol sa usapin.