Leonard bumida sa panalo ng Clippers

Nagbagsak si Kawhi Leonard ng 28 points at nagdagdag si Terance Mann ng season-high 23 para banderahan ang Clippers sa 122-112 paglunod sa Philadelphia 76ers.

Nag-ambag si Paul George ng 24 points para sa pang-limang sunod na ratsada ng Clippers (31-16).

Umiskor si Tobias Harris ng 29 points para sa 76ers (32-14) na nagtapos ang six-game road winning streak habang may 17 at 16 markers sina Danny Green at Shake Milton, ayon sa pagkakasunod.

Sa Salt Lake City, humataw si Donovan Mitchell ng 35 points at may 28 markers si Fil-American guard Jordan Clarkson para sa 126-110 pagdurog ng Utah Jazz (34-11) sa Memphis Grizzlies (21-22).

Sa Milwaukee, tumipa sina Alec Burks at RJ Barrett ng tig-21 points para sa 102-96 paggupo ng New York Knicks (24-22) sa Giannis Antetokounmpo-less Bucks (29-16).

Sa Oklahoma City, humugot si Jayson Tatum ng 20 sa kanyang 27 points sa second half at nakabawi ang Boston Celtics (23-23) sa fourth quarter para kunin ang 111-94 panalo sa Oklahoma City Thunder (19-26).

Sa San Antonio, nagtala si Jakob Poeltl ng 20 points kasunod ang 17 markers ni DeMar DeRozan para ihatid ang Spurs (23-20) sa 120-104 pagpapak sa Chicago Bulls (19-25).

Sa New Orleans, kumamada si Zion Williamson ng 38 points at may 20 markers si Nickiel Alexander-Walker para sa 112-103 pagdaig ng Pelicans (20-25) sa Dallas Mavericks (23-21).