Leader ng criminal gang na wanted sa Robbery, nalambat sa Navotas

LAGLAG sa selda ang isang lalaking leader ng criminal gang na wanted sa kaso ng Robbery nang maaresto ng pulisya sa manhunt operation sa Malabon City.
Ikinasa ng mga tauhan ni Northern Police District (NPD) District Director P/BGen. Christopher Dela Cruz ang pagtugis sa 37-anyos na akusado na wanted sa dalawang bilang na kasong Robbery with Intimidation against Person.

Ayon sa District Special Operations Unit (DSOU) ng NPD, ang akusado na residente ng Navotas City ay nakatala bilang No. 3 sa Top Ten Most Wanted Person sa Navotas City Police Station.

Dakong alas-11 ng umaga nang makorner ng pinagsamang mga operatiba ng DSOU, Northern District Intillegence Team – Regional Intillegence Unit (NDIT-RIU NCR) at Warrant and Subpoena Section ng Navotas CPS ang akusado sa Block 17, Brgy., Longos, Malabon City.

Maayos naman umanong naisilbi sa akusado ang warrant of arrest na inisyu ng Presiding Judge ng RTC Branch 286, Navotas City, noong December 2, 2025, na may inirekomendang piyansa na P100,000 bawat bilang.

Pansamantalang nakapiit ang akusado sa NPD Custodial Facility Unit habang hinihintay ang pagpapalabas ng commitment order mula sa korte para sa paglilipat sa kanya sa City Jail. (Richard Mesa)