Kodigo pinapayagan ng Comelec sa pagboto

PINAPAYAGAN  at hinihi­kayat pa ng Commission on Elections (Comelec) ang mga botante na magdala ng kanilang mga kodigo ng mga ibobotong kandidato sa mga ‘voting precincts’ sa araw ng halalan sa Mayo 9. Sinabi ni Elaiza David, Director III ng Election and Barangay Affairs Department ng Comelec, na importante na dokumento ang pagdadala ng botante ng kodigo.

Ito ay para hindi magkamali sa pag-shade ng ibobotong kandidato at para na rin hindi magtagal ang botante sa pag-iisip kung sino ang iboboto.

Bagama’t hindi rekisito ang ID sa pagboto, maganda ring may dala nito ang botante para kung sakaling magkaroon ng problema sa pagkakakilanlan ng botante ay mabilis itong mareresolba.

“It’s not really a requirement pero maganda pong may dalang ID just in case na medyo magkakaroon ng problema ma-challenge sa identity,” paliwanag ni David.

Ito ay makaraang aminin rin niya na may mga problema minsan sa pag-a-upload ng pangalan ng botante sa precinct finder. Kung hindi makikita ang kanyang pangalan, inabisuhan ang mga botante na magtungo sa election officer para sila matulungan.