KELOT TIMBOG SA MARIJUANA

Arestado ang isang 28-anyos na lalaki matapos mabisto ang dalang marijuana makaraang masita ng mga pulis dahil walang suot na face mask sa Valenzuela city, kamakalawa ng hapon.

Nahaharap sa kasong paglabag sa Comprehensive Dangerous Drug Act of 2002 at Art 151 ang suspek na si Kendrick Dolar, ng 1233 Medina St. Brgy. Gen. T. De Leon.

Ayon kay Valenzuela Police Station Drug Enforcement Unit (SDEU) investigator PSSg Carlos Erasquin Jr, alas-12:10 ng tanghali, nagpapatrolya ang mga tauhan ng Sub-Station 2 sa kahabaan ng Bitik, Medina St. Brgy. Gen. T. De Leon nang sitahin ni PCpl Alfonso Hementera ang suspek na sakay ng bisikleta dahil walang suot na face mask.

Gayunman, hindi nakipagtulungan at pumalag pa ang suspek sa mga pulis na naging dahilan upang arestuhin ito at nang kapkapan ni PSSg Alvaro Vargas ay nakuha sa kanya ang dalawang plastic sachets na naglalaman ng hinihinalang pinatuyong dahon ng marijuana na nasa P600,00 ang halaga, glass pipe na may laman ng sunog na marijuana at disposable lighter. (Richard Mesa)