Kelot na wanted sa rape sa Navotas, himas-rehas
- Published on September 4, 2025
- by @peoplesbalita
HIMAS-REHAS ang 23-anyos na kelot na akusado sa panggagahasa sa isang babaeng biktima matapos malambat ng pulisya sa pinaigting na operasyon kontra wanted person sa Navotas City.
Hindi na nakapalag ang akusado na si alyas “Dodong”, residente ng Brgy. NBBS, Dagat-Dagatan nang arestuhin ng mga tauhan ni Navotas Police Acting Chief P/Col. Renante Pinuela sa Kanduli St. Blk 29, Brgy. NBBS Dagat-Dagatan.
Ayon kay Col. Pinuela, ang akusado ay kapwa nakatala bilang No. 5 sa Ten Top Most Wanted Person sa Navotas City Police Station at Northern Police District (NPD).
Nang makatanggap ng impormasyon ang mga operatiba ng Navotas Police Warrant and Subpoena Section na naispatan sa kanilang lugar ang akusado ay agad ikinasa ng mga ito ang pagtugis sa kanya.
Dakong alas-7:30 ng gabi nang isilbi ng mga tauhan ni Col. Pinuela sa akusado ang warrant of arrest na inisyu ng Family Court, NCJR Branch 9, Navotas City para sa kasong Rape.
Pansamantalang nakapiit sa custodial facility unit ng Navotas CPS ang akusado habang hinihintay ang pagpapalabas ng commitment order mula sa hukuman para sa paglilipat sa kanya sa City Jail. (Richard Mesa)