Kelot na nasangkot sa kaguluhan sa Caloocan, timbog baril

SA kulungan ang bagsak ng 29-anyos na lalaking may dalang baril matapos masangkot sa isang kaguluhan sa Caloocan City.

Nakumpiska ng mga tauhan ni Caloocan Police Chief P/Col. Paul Jady Doles kay alyas “Mar” ang hindi lisensiyadong kalibre .38 revolver na kargado ng dalawang bala dakong alas-2:00 ng madaling araw sa Brgy. 17, Camarin, North Caloocan.

Sa ulat ni Doles kay Northern Police District (NPD) Director P/BGen. Josefino Ligan, nagresponde sa tawag ng isang concerned citizen ang mga operatiba ng Cadena De Amor Police Sub-Station 11 hinggil sa nagaganap na riot ng ilang kalalakihan sa naturang lugar.

Nagpulasan ang mga sangkot sa kaguluha nang dumating ang mga pulis maliban kay alyas Mar na nabigo ng makatakas nang makorner kaagad ng mga alagad ng batas.

Kasong paglabag sa R.A.10591 o ang Comprehensive Firearms and Ammunition Regulation Act at Batas Pambansa Blg. 881 (Omnibus Election Code of the Philippines) ang isasampa ng pulisya laban sa suspek sa Caloocan City Prosecutor’s Office. (Richard Mesa)