Kelot, isinelda sa iligal na baril sa Valenzuela

KULUNGAN ang kinasadlakan ng isang tambay nang salakayin ng pulisya ang kanyang bahay sa bisa ng isang search warrant dahil sa pag-iingat umano ng hindi lisensyadong baril sa Valenzuela City.

Mahaharap sa kasong paglabag sa RA 10591 (Comprehensive Firearms and Ammunition Regulation Act) ang suspek na si alyas “Cris”, 31, ng No.8, G. Marcelo St., Barangay Maysan.

Sa pinagsamang imbestigasyon nina PMSg Joel Sia at PSSg Nicolas Gutierez, nakatanggap ng impormasyon ang mga tauhan ni Karuhatan Police Sub-Station 9 Commander P/Capt. Joan De Leon na nag-iingat umano ng hindi lisensyadong baril ang suspek kaya nag-apply sila ng search warrant sa korte.

Nang maglabas ng search warrant ang Valenzuela Regional Trial (RTC) Branch 270, agad sinalakay ng mga tauhan ng SS9 sa pangunguna ni Capt. De Leon ang bahay ng suspek.

Dakong alas-1:40 ng hapon nang simulang halughugin ng mga pulis ang bahay ng suspek sa bisa ng nasabing search warrant at sa presensya ng mga witness na mga opisyal ng barangay.

Nasamsam ng mga pulis ang isang kalibre .38 revolver na kargado tatlong baka at nang hanapan siya ng kaukulang mga dokumento hinggil sa ligaledad ng nasabing armas, walang naipakita ang suspek kaya pinosasan siya ng mga tauhan ni Capt. De Leon. (Richard Mesa)