Kapag nag- full blast na ang rehabilitation… Skyway toll fee ililibre habang inaayos EDSA

TAHASANG sinabi ni Transportaion Secretary Vince Dizon na pinag-uusapan at pinag-aaralan na nilang ilibre ang toll fee sa Skyway Stage 3 sa Hulyo o Agosto kapag nag-full blast na ang EDSA rehabilitation.

Ayon kay Dizon, ang mga apektadong segment lang ng EDSA kung saan kailangan mag-detour ng mga sasakyan na magiging libre, ito ay bahagi ng ­inisyal na intervention ng Department of Transportation (DOTr) at ng Metropolitan Manila Development Authority (MMDA) para maibsan ang matinding trapik na magi­ging dulot ng isasagawang rehabilitasyon sa EDSA.

Samantala, sa halip na isang linggo, isang buwan gagawin ang dry run ng Odd-Even Scheme na ipapalit ng Metropolitan Manila Development Authority (MMDA) sa number coding habang inaayos ang EDSA.

Ito naman ang sinabi ni MMDA Chairman Atty. Romando Artes kung saan 24/7 ipatutupad ang dry run simula Hunyo 16. Una nang sinabi ng MMDA na isang linggo lang ang gaga­wing dry run para sa Odd-Even Scheme.

Sa Odd-Even Scheme, bawal dumaan ang mga plakang nagtatapos sa 1,3,5,7, 9 sa tuwing Lunes, Miyerkules, at Biyernes habang ang mga plakang nagtatapos naman sa 2,4,6,8,0 ay bawal sa araw ng Martes, Huwebes at Sabado.

Nilinaw ni Artes na mangingibabaw ang Odd-Even Scheme sa kahabaan ng EDSA habang ang number co­ding scheme naman ang patuloy na ipatutupad sa iba pang main thoroughfare “With the enforcement of the odd-even scheme, we are expecting a 40% reduction in the number of vehicles along EDSA,” ani Artes. ( Daris Jose)