Kamara, tuloy ang trabaho para sa ekonomiya at kaginahawaan kahit may dinidinig na impeachment

PATULOY ang Kamara sa pagsusulong ng mga panukalang sumusuporta sa ekonomiya ng bansa at pagbibigay tulong sa mga Pilipino kahit nagsasagawa ito ng impeachment proceedings laban kay Vice President Sara Duterte.

“Kahit may impeachment, tuloy pa rin tayo sa iba nating obligasyon,” ayon kay Batangas Rep. Gerville “Jinky Bitrics” Luistro, chairman ng House Committee on Justice, kasabay nang pormal na pagbubukas ng hearing proper sa dalawang natitirang impeachment complaints laban sa VP.

Iginiit ni Luistro na patuloy ang Kamara, sa pangunguna ni Speaker Faustino “Bojie” G. Dy III, na nakatuon sa mga mahahalagang isyu na kinakaharap ng bansa kabilang na ang tumataas na presyo ng langis, pangunahing bilihin at pagmimintina ng public services.

“Even as we undertake this solemn constitutional duty, the House of Representatives does not forget its other responsibilities,” pahayag ni Luistro.

Inihalimbawa nito ang ilang panukalang batas na inaasahang makakatulong sa bansa tulad ng pagbibigay otorisasyon kay Presidente Bongbong Marcos na suspendihin o bawasan ang fuel excise taxes.

“Nariyan na po ang panukalang batas na ‘yan—pinag-aralan, pinag-isipan, at inaasahang makatutulong sa ating mga kababayan,” aniya.

Idinagdagdag nito na patuloy ang Kamara sa pagsusulong ng lehislasyon para tugunan ang usapin ng inflation, food security at access sa serbisyo at reporma para pagandahin pa ang government efficiency.

Kabilang na dito ang panukalang pagbuwag sa travel tax, pagpapatupad ng digital payments sa government transactions, at streamlining sa delivery of public services.

Dagdag pa ang mga isinusulong na reporma sa edukasyon kabilang na ang amendments sa Universal Access to Quality Tertiary Education Act at Presidential Merit Scholarship Program.

Isinusulong din sa Kamara ang Anti-Political Dynasty bill matapos ang ginanap na konsultasyon sa Luzon, Visayas, at Mindanao, at sa pagtatapos sa deliberasyon nito sa plenaryo kamakailan,

“That governance is a constant balancing act—attending to urgent needs, while fulfilling constitutional obligations. Kahit may impeachment, tuloy tayo sa iba nating tungkulin. Ang ating serbisyo publiko ay hindi napuputol, hindi tumitigil—kahit sa gitna ng pinakamabigat na tungkulin,” giit nito.

Sinabi pa nito na ang accountability function ng Kamara ay dapat na kaakibat sa responsive governance.

“While we scrutinize those in power, we do not lose sight of the hardships faced by the powerless,” saad pa ni Luistro.

Pormal na binuksan ng justice committee nitong Miyerkules ang impeachment hearings upang idetermina kung mayroong probable cause upang maiakyat ito sa senado para sa trial.
(Vina de Guzman)