Kai Sotto pinagbidahan ang Adelaide 36ers

MULING nagpasiklab si Kai Sotto upang tulungan ang Adelaide 36ers sa 88-83 overtime win laban sa Melbourne United sa 2021-2022 Australia National Basketball League (NBL) kahapon sa Adelaide Entertainment Center.

Naging instrumento ang 7-foot-3 Pinoy cager para makuha ng 36ers ang ikaapat na panalo sa 10 pagsalang para saluhan sa No. 6 spot ang Sydney na may katulad na 4-6 baraha.

Lumasap naman ang Melbourne ng ikatlong kabiguan subalit sapat pa rin ang rekord nitong 8-3 para okupahan ang unang puwesto.

Kumana ang 19-anyos na si Sotto ng 12 puntos kabilang ang krusyal na jumper sa huling 34 segundo ng laro. Humatak din si Sotto ng apat na rebounds at isang assists sa 21 minutong paglalaro.

Dikdikan ang laban sa extra period kung saan nagtala ang Adelaide ng 86-83 kalamangan.

Subalit isinalpak ni Sotto ang huling basket ng Adelaide may 34.6 segundo na lamang ang nalalabi para tuluyang makuha ng kanilang tropa ang panalo.

Nanguna para sa Adelaide si Dusty Hannah na nagtala ng 19 puntos, tatlong rebounds at dalawang assists habang naglista si Cameron Bairstow ng double-double na 16 markers at 12 boards.

May sariling double-double output na 12 points at 14 boards si Daniel Johnson para sa 36ers.

Nasayang naman ang pinagsikapan na 23 points at 12 rebounds ni Jo Lual-Acuil para sa Melbourne. Sunod na hahataw ang Adelaide laban sa Brisbane sa Pebrero 3.