Ilang milyong trabaho, paglago ng ekonomiya inaasahan sa Cha-cha at pag-apruba sa CREATE Act

Inaasahang lalo pang lalakas ang paglago ng ekonomiya ng Pilipinas kung maaprubahan hindi lamang ang mga itinutulak na amiyenda sa economic provisions ng Saligang Batas sa ilalim ng House Resolution of Both Houses No. 2 (RBH 2) kundi maging ng Corporate Recovery and Tax Incentives for Enterprises (CREATE) Act.

Ayon kay House Ways and Means Committee chairman Joey Sarte Salceda, maraming trabaho ang mabubuo dahil sa pagtaas ng capital formation sa Pilipinas sa oras na maging ganap na batas ang RBH 2 at CREATE.

Sa kanyang tantya, sa loob ng 10 taon, 6.6 million na bagong trabaho ang malilikha bilang resulta sa pag-amiyenda sa economic provisions ng Saligang Batas, habang 1.4 million hanggang 2 million naman sa CREATE.

Aabot sa P300 million ang inaasahang maidadagdag sa kapital ng bansa dahil sa RBH 2, habang P288 billion halaga ng investments kada taon dahil sa pagpapababa sa corporate income tax rates at pag-rationalize nang fiscal incentives.

Ayon kay Salceda, ang CREATE ang siyang “sweetener” sa short-term as medium-term investments sa oras na matuloy ang mahahalagang reporma sa ekonomiya ng bansa sa ilalim ng RBH 2.

Sinabi ni Finance Sec. Carlos Dominguez na kailangan simulan na ang proseso tungo sa pagkakaroon ng liberal investment regime upang sa gayon ay magsimulang bumuhos na rin ang mga investment papasok ng Pilipinas.