Hihigpit ang Presidential race kapag kumampi kay Robredo ang undecided voters

HIHIGPIT  ang karera sa pagkapangulo kapag pumanig ang tinatawag na “undecided” na mga botante kay Vice President Leni Robredo sa darating na halalan sa Mayo, giit ng isang political analyst.

Ayon kay Froilan Calilung, na nagtuturo ng poli­tical science sa University of Santo Tomas, malaki ang epekto ng undecided voters sa resulta ng halalan kapag binoto nila si Robredo.

Una nang sinabi ng OCTA Research na nasa 20 porsiyento pa ng mga Pilipinong botante ang wala pang pinal na kandidato sa darating na halalan sa Mayo.

“But we could surmise na itong 20 percent na ito, if it goes in the way of VP Leni Robredo, may actually create a big effect on the voter turnout,” dagdag pa niya.

Sa hiwalay na panayam, sinabi ni OCTA Research president at UP Political Science professor Ranjit Rye na maaari pang ligawan ng mga kandidato ang tinatawag na “soft votes” o iyong hindi pa nakakapagdesisyon kung sino ang iboboto.

Hinikayat din ni Rye ang mga botante na huwag ibase ang kanilang pasya sa resulta ng survey at sa halip ikonsidera ang plataporma, programa at pangarap ng mga kandidato para sa bansa. (Daris Jose)