GUNMAN SA CAPISTRANO SLAY CASE, INIHARAP SA MAYNILA

INIHARAP sa Talk To The People sa Manila City Hall ang pangunahing suspek sa pagpatay sa retiradong pulis na si George Capistrano.Sa pangunguna ni Mayor Isko Moreno at ng Manila Police District, ipinakita sa publiko ang itinuturong gunman sa krimen na iniugnay sa robbery-holdup.Batay sa imbestigasyon, nahuli ang suspek madaling araw sa San Pedro, Laguna, matapos ituro ng sumukong driver ng motorsiklo ang kanyang pagkakakilanlan.Ayon sa suspek, nasangkot siya sa mga kaso ng pagnanakaw na nauwi sa serye ng robbery-holdup mula pa noong 2024 sa Metro Manila at mga karatig-probinsiya.Ang pinakahuling insidente ay sa Maynila kung saan nasawi ang biktima.Nagpasalamat si Mayor Isko sa MPD at sa publiko sa pagbibigay ng impormasyon, habang ikinadismaya rin ang pagkakadawit ng live-in partner ng suspek sa pagtatago nito.Para sa alkalde, personal ang kasong ito, dahil naging bahagi ng kanyang security ang biktima—kaya’t tiniyak niya na may mananagot at walang makakatakas sa batas.Nagbabala rin si Mayor Isko na walang puwang ang krimen sa Maynila, at sinabi ring tukoy na ng mga awtoridad ang mga nasa likod ng mga insidente ng “basag-kotse” sa lungsod.Samantala, humingi ng tawad ang suspek, ngunit hindi ito tinanggap ng pamilya Capistrano.Nabatid ding may iba pang kasong kinakaharap ang suspek sa Baguio City.Sa ngayon, hawak na ng MPD ang suspek at inihahanda na ang pagsasampa ng kaso laban dito. (Gene Adsuara)