Guce babawi sa Symetra

TIYAK na reresbak si Clarissmon ‘Clariss’ Guce sa 16th Symetra Tour 2021 third leg – $200K 1st Casino Del Sol Golf Classic sa Abril 16-19 sa Sewailo Golf Club sa Tucson, Arizona.

Sumablay sa cut ang 30 taong-gulang, isinilang na Pinay na nakabase sa Estados Unidos at nasa ikaanim niyang taon sa Symetra, sa unang dalawang yugto ng official golf development tour at qualifier ng Ladies Professional Golf Association (LPGA) Tour .

Ito ay sa $200K 1st Carlisle Arizona Golf Classic noong Marso 18-21 sa AZ at sa $150K 9th IOA Championship sa California noong Mar. 26-28.

Ang pinakamaangas niyang taon sa ST ay nang makasambot ng dalawang korona noong 2016 sa Danielle Downey Credit Union Classic na may gantimpalang $30K (₱1.4M), at Decatur-Forsyth Classic na may premyongng $19.5K (₱947K).

Humampas na rin sa 19 na torneo ng LPGAT si Guce sa dalawang taong pagkampanya. Naka- 16 events siya noong 2019 at tatlo nitong 2020.

Pinakamagarang tapos niya sa isang event ay ang ika-12 puwesto sa Indy Women in Tech Championship sa Indianapolis na rito’y sinubi niya ang $33,573 (₱1.6M). (REC)