Google, YouTube hinto muna sa pol ads

Pansamantalang ihihinto ng internet giant Google kasama ang sikat na platform na YouTube ang pagtanggap ng mga political ads pagsapit ng ‘campaign period’ sa 2022.

Sa pahayag ng ­Google, epektibo ito sa mga election ads na binayaran sa Google Ads, Display, Video 360.

Maging sa mga shopping platforms na pino-promote naman sa Google, YouTube, at iba pa nilang mga kapartner.

Epektibo ito mula Pebrero 8, 2022 hanggang Mayo 9, 2022 sa kasagsagan ng campaign at silence period.

“Google is focusing its efforts and resources on upcoming election-related initiatives which aim to help people access useful and accurate information via product features and media literacy programs, encourage participation in the voting process, and help protect the integrity of the elections,” ayon sa Google.

Nakikipagtulungan din umano ang Google sa Commission on Elections (Comelec) sa ilang ­inisyatibo sa halalan tulad ng voter registration na hino-host ng Google Cloud.

Sa kabila nito, may iba pang plataporma para makapagpa-ads ang mga kandidato gamit ang internet sa pamamagitan ng ibang platforms tulad ng Facebook, Twitter at iba pang internet browsers at applications.