Gobyerno, may ginagawa nang paghahanda para matiyak na hindi makapapasok sa bansa ang bagong variant

TINIYAK ng Malakanyang na may ginagawa nang paghahanda ang pamahalaan para masigurong hindi makapapasok sa bansa ang napaulat na bagong variant ng COVID-19 na Lambda variant na una ng natukoy sa Peru.

“Alam mo, lilinawin ko pa ho. Kahit ano pang variant ‘yan, kapareho po ang ating katugunan. Unang-una, iyong ating border control, pinagbabawalan natin iyong mga manggagaling sa mga lugar na matataas itong mga mas nakakahawang mga variants. Pangalawa, iyong PDITR natin. Hindi po substitute talaga ang kahit ano sa PDITR, iyong mask, hugas, iwas, iyong ating detection, isolation and treatment. Wala po talagang substitute diyan sa PDITR na iyan,” ayon kay Presidential Spokesperson Harry Roque.

” At pangatlo iyong pinapalawak pa natin lalo ang numero ng mga nababakunahan. It’s really a race against the new variants, pero nakikita naman po natin eh mayroon po tayong mga headways pagdating sa pagbabakuna,” dagdag na pahayag ni Sec. Roque.

Sa ulat, mayroon na namang bagong variant na banta sa Pilipinas ito ay ang Lambda variant na inihahalintulad sa Delta variant.

Ito ang inihayag ni infectious disease expert Dr. Rontgene Solante. kaya’t kailangang makapagsagawa ng mga pamamaraan na huwag makapasok sa bansa.

Sinabi ni Solante na bagama’t hindi pa natutukoy sa Pilipinas, kumakalat na ang Lambda variant na unang natukoy sa Peru, sa iba’t ibang bansa.

Sa ngayon ay nana­natili pa rin itong isang ‘variant of interest’ ngunit may potensyal na maging ‘variant of concern’ tulad ng Delta, Alpha, Beta, at Gamma.

Nauna rito, lumitaw sa mga laboratory experiments na ang mutations ng Lambda ay maaari ring labanan ang antibodies na pinoprodyus ng mga bakuna.

Ngunit hindi naman magiging ganap na walang silbi ang COVID-19 vaccines laban sa Lambda. Maaari umanong mabawasan ang bisa nito ngunit hindi naman tuluyang mawawala ang proteksyon. (Daris Jose)