Ginang, 2 pa kalaboso sa shabu sa Valenzuela

KALABOSO ang tatlong hinihinalang drug personalities kabilang ang isang lolo at ginang nang maaresto ng pulisya habang nagsusugal sa magkahiwalay na lugar sa Valenzuela City.

Sa kanyang report kay Valenzuela Police Chief P/Col. Joseph Talento, sinabi ni Polo Police Sub-Station 5 Commander P/Capt. Doddie Aguirre na habang nagsasagawa ng Oplan Galugad ang kanyang mga tauhan sa H. Bautista St., Brgy., Arkong Bato nang matiyempuhan ng mga ito ang tatlong indibidwal na nagsusugal ng baraha dakong alas-12:30 ng hating gabi.

Hindi na nakapalag ang tatlong nang dakmain nina P/MSgt. Israel Gutierrez, PCpl Jhon Kenneth Sison at Pat. Joshua Miguel Capiral.

Nakumpiska sa kanila ang bet money, playing cards, at dalawang plastic sachets na naglalaman ng hinihinalang shabu na nakuha kay alyas “Maria”, at alyas “Lolo Cardo”.

Nauna rito, naaktuhan naman ng iba pang mga tauhan ni P/Capt. Aguirre ang dalawang lalaki na nagka-cara y cruz sa Jasmin St., Brgy., Balangkas bandang alas-10:00 ng gabi na dahilan ng kanilang pagkakaaresto.

Nakuha sa kanila nina PSSg Melvic Pingad at PSSg Ricardo Santos ang bet money at pangara habang ang isang plastic sachet ng umano’y shabu ay nasamsam kay alyas “John”.

Nahaharap ang mga suspek sa kasong paglabag sa PD 1602 o ang Anti-illegal Gambling Law habang karagdagan pa na kasong paglabag sa R.A 9165 o ang Comprehensive Dangerous Drug Act of 2002 ang kakaharapin pa ng tatlong sa kanila. (Richard Mesa)