‘Fully-vaccinated’ na seniors, bawal pa ring lumabas

Hindi pa rin dapat payagan na lumabas ng bahay ang mga senior citizen kahit na ‘fully-vaccinated’ na sila dahil sa may banta pa rin na mahahawa sila ng COVID-19 bunsod ng mababa pang bilang ng nababakunahan.

“Unang-una, ang baba pa ng vaccination rate natin… Therefore, in this point in time, kahit na sino pa ‘yan, mapa-senior citizen man ‘yan o ‘yong mga nasa 40s, mga nasa productive age group natin, I think hindi pa rin tayo dapat basta-basta magluwag doon sa mga restrictions natin,” ayon kay Dr. Maricar Limpin, vice-president ng Philippine College of Physicians.

Sinabi niya na dapat hintayin muna na mabakunahan ang 70 por-syento ng populasyon ng bansa bago pag-usapan ang mga pagluluwag sa restriksyon.

Bukod sa maaaring mahawa kahit bakunado na, puwede rin na sila ang makahawa ng iba na hindi pa nababakunahan.

Kasunod ito ng pa-nawagan ng National Commission of Senior Citizens na magtalaga ng eksklusibong oras ang mga supermarkets at botika para sa mga senior citizen.

Ayon kay Atty. Franklin Quijano, chairperson ng NCSC, maaari umano na ibigay sa kanila ang oras na mula 8-10 ng umaga dahil maaagang nagigising ang mga senior citizen at hindi makakahalubilo ang ibang age-group.

Sa pamamagitan nito, mapapataas ng mga senior citizen hindi lang ang kanilang kalusugang pisikal kundi pati kalusugang mental. (Gene Adsuara)