Free high-speed Wi-Fi sa estudyante aprub na sa Kamara

PINAGTIBAY ng Kamara sa ikatlo at pinal na pagbasa ang House Bill (HB) No. 9532 o Universal Access to Digital Academic Learning Resources Act na magbibigay ng libreng high-speed Wi-Fi at digital textbooks sa mga estudyante sa pampubliko at pribadong kolehiyo.

Ayon kay Speaker Faustino “Bojie” Dy III, layunin ng panukala na tugunan ang hindi pantay na access sa learning materials at matatag na internet connection. “Today, a student who cannot afford textbooks or reliable internet access is already starting at a disadvantage… Through this bill, our youth do not need to make this painful choice,” ani Dy.

Sa botong 202 na pabor, walang tumutol at walang abstain, ipinasa ang HB 9532 na magtatatag ng National Academic Content Repository (NACR) sa ilalim ng Commission on Higher Education (CHED), katuwang ang Department of Information and Communications Technology (DICT) at iba pang HEIs.

Sa NACR, libre ang online access sa digital textbooks, lecture videos, syllabi, research papers at iba pang open educational resources. Mandato rin ng panukala ang pagkakaroon ng high-speed Wi-Fi para sa mga estudyante at faculty, na bibigyang prayoridad ang mga rural at kulang sa resources na campuses.