ER ng private hospitals higit 100% puno na

Lagpas na sa 100% ang kapasidad sa operasyon ng maraming pribadong pagamutan ngayon sa iba’t ibang panig ng bansa dahil sa nararanasang pagtaas ng mga kaso ng COVID-19.

Sinabi ni Philippine College of Physicians (PCP) president Dr. Maricar Limpin na may ilang ospital pa nga ang nasa 130%-150% na ang operasyon ng mga emergency rooms.

“Hindi na kami mas­yadong nagulat. Ang ospital ngayon puno na [ang] emergency room. Hindi lang 100%. Mahigit sa 100%,” ayon kay Limpin.

Dahil dito, nagkakaroon na rin ng kakapusan ang mga pagamutan sa mga medical supplies partikular na sa ‘mechanical ventilators’ para sa mga pasyente na hirap nang huminga.

Sa Cebu City, dahil sa kakapusan ng ventilators ay napipilitan ang mga mangagamot na pumili ng pasyente na gagamitan nito. Mas pinipili na umano ngayon kung sino ang mas may mataas na tsansa na makaligtas.

Dahil dito, pinayuhan ni Limpin ang mga pas­yente na nakaka­ramdan ng mga sintomas na magtungo muna sa pinakamalapit na health center o anumang health facility para matignan ng health workers at mabigyan ng agarang atensyong medikal.

Marami umano kasi sa mga nakararanas ng sintomas ay ayaw agad magpa-check-up at hinihintay pa na lumala ang kundisyon saka magpapasugod sa pagamutan.

Samantala, inihayag naman ng Department of Public Works and Highways (DPWH) na mapupuno na rin ang mga isolation centers sa Metro Manila. Sa kanilang datos, nasa 65.68% nang okupado ang mga CO­VID-19 beds.

Nasa 2,503 higaan na ang okupado at nasa 1,308 na lamang ang natitirang bakante sa 30 isolation facilities sa NCR. (Daris Jose)