Educational assistance program ng Manila LGU, natanggap na ng unang batch

TINATAYANG nasa mahigit 600 benepisyaryo ang nabiyayaan ng lokal na pamahalaang lungsod ng Maynila sa pamamagitan ng Manila Department of Social Welfare (MDSW) ng kanilang educational assistance program ngayong araw.

Pinangunahan ni Manila Mayor Maria Sheilah “Honey” Lacuna-Pangan, kasama si MDSW Director Ma. Asuncion “Re” Fugoso, ang paggawad ng tig-P5,000 educational assistance sa 674 benepisyaryo nito na ginanap sa San Andres Sports Complex.

Nasa kabuuang P3,370,000 ang naipamahagi ng Manila LGU sa mga benepisyaryo na nagmula sa distrito 1, 4, at 6 ng nasabing lungsod.

“Makakaasa po kayo nga ang pamahalaang Lungsod ng Maynila ay gagawin at mag-iisip ng mga paraan para lalong maibsan ang napakabigat na suliranin, dahil hanggang ngayon ay nasa ilalim pa rin po tayo ng state of health emergency,” ayon sa Alkalde.

Nabatid kay Fugoso na ito ang una sa apat na batch, kung saan mahigit 2,000 recipients mula sa Maynila ang inaasahang makakatanggap ng nasabing educational assistance. (BISHOP JESUS “JEMBA” M. BASCO)