Drivers, conductors, at dispatchers, salagan mula sa hidwaan sa pagitan ng LTFRB at bus operators

PAHAYAG  ito ni Bayan Muna Chairperson Neri Colmenares kasabay nang paggiit na tapusin at resolbahin ng transportation officials ang nakakalungkot na kalagayan ng mga drayber at konduktor na patuloy na hindi nakakatanggap ng kanilang sahod.

Sinisi ng mga bus companies ang Land Transportation Franchising and Regulatory Board (LTFRB) sa pagkaka-delay sa sahod habang sinabi naman ng LTFRB na ang mga bus companies ang nagkulang sa pagsusumite ng kumpletong papeles.

“Ang problema sa pagdadahilan ng dalawang panig ay naiipit ang mga drayber, konduktor at dispatser. Kung sino pa ang naglilingkod sa libu-libong pasahero, sila pa ang nagigipit. It’s the bus employees and the riding public that suffer in the end,” ani Colmenares.

Ayon kay Colmenares, dapat gawin ng mga bus operators ang kanilang parte at agad na sumunod sa requirements ng LTFRB.

Para naman sa LTFRB, sinabi nito na dapat tanggalin ng board ang mga chokepoints sa proseso ng pagpapaluwal ng bayad sa mga operators para hindi magipit ang mga empleyado ng mga kumpanyang ito.

“Kailangan manaig ang interes ng mga nasabing empleyado dahil apektado ang mga pasahero kapag tumigil sila sa pamamasada dahil sa kawalan ng sweldo. Kayang-kaya naman mabigyan ang hiling ng mga tsuper, konduktor, at mga dispatser, kung mas aayusin pa ang proseso sa pagbayad sa mga miyembro ng mga bus consortium,” pagtatapos ni Colmenares. (ARA ROMERO)