Diaz may plano para sa mga nais maging weightlifter

Sakaling dumating ang oras na kailangan na niyang magretiro ay gusto ni national weightlifter Hidilyn Diaz na maging opisyal ng Samahang Weightlifting ng Pilipinas (SWP).

Ito, ayon sa 30-anyos na tubong Zamboanga City, ay para matulungan ang mga batang weightlifters na makapaglaro rin sa Olympic Games kagaya niya.

“Siguro iyong purpose ko kasi kaya ako nandito pa rin at naglalaro, gusto ko talaga na maraming Pilipino na papasok sa weightlfiting, mag-try sila ng weightlifting,” sabi ng 2016 Rio de Janeiro Olympics silver medalist.

“I’m hoping na after ng career ko, maging official ako sa weightlifting para mas marami akong matulungan. At I’m hoping na kapag nakapasok sila sa Palarong Pambansa, kapag nakapasok sila sa UAAP, may mga scholarship iyong mga bata,” dagdag nito.

Pormal na inangkin ni Diaz ang tiket para sa 2021 Olympics sa Tokyo, Japan, nakatakda sa Hulyo 23 hanggang Agosto 8, matapos sumali sa Asian Weightlifting Championships sa Tashkent, Uzbekistan.