Dengue outbreak, idineklara sa Quezon City

Dengue outbreak, idineklara sa Quezon City

 IDINEKLARA ng Quezon City government sa pama­magitan ng City Health Department (QCHD) ang dengue outbreak dahil sa patuloy na pagtaas ng kaso nito sa naturang siyudad.

Kasabay nito, ina­lerto at pinakilos na rin ni Quezon City Mayor Joy Belmonte ang lahat ng  assets at resources upang matiyak na ang mga programa at serbisyo ng lokal na pamahalaan ay maging accessible para sa lahat ng mamamayan ng lungsod  upang mapigilan ang pagdami pa ng kaso ng sakit na dengue.

“Our declaration of a dengue outbreak ensures that we are on top of the situation, and we are doing everything we can to protect our residents from this deadly di­sease, especially our children,” pahayag ni Mayor Joy Belmonte sa ipinatawag na media conference kahapon.

Sa rekord ng City ­Epidemiology and Surveillance Division (CESD) ng QCHD, mula Enero 1 hanggang  Pebrero 14, 2025, nasa 1,769 na ang kaso ng  dengue o nasa halos  200 porsiyento na mataas  sa kaso na naitala noong 2024 sa kaparehong period.

Sa kabuuang bilang, nasa 58 porsi­yento ng naitalang kaso ng dengue ay mga school-aged children (5 to 17 years old) habang 44 porsiyento  ay mga bata na mula 1 years old hanggang 10 years old.

Inihayag ni ­Belmonte na karamihan sa dinapuan ng dengue ay mga bata kaya’t inalerto ang mga magulang sa nararamdaman ng kanilang mga anak at ma­nguna sa clean-up drive sa mga komunidad.

Inihayag ni ­Belmonte na ang lahat ng 66 QC Health Centers ay nakabukas din tuwing Sabado at Linggo mula alas-8 ng umaga hanggang alas 5 ng hapon upang maserbisyuhan ang mga may sakit na dengue.

Samantalang nagla­tag na rin ang QC LGU ng fever express lane sa lahat ng  city’s health cen­ters at hospitals upang agad magamot ang mga Qcitizens na may lagnat na sintomas ng sakit na dengue. Nagkaloob din ng free dengue test kits na makukuha sa mga healh centers at hospital sa lungsod. (Daris Jose)