Dating kasagupa ni Pacman na si Broner kulong sa US

NAKAKULONG ngayon ang dating kasagupa ni Filipino boxing champ Manny Pacquiao na si dating four-division world boxing champion Adrien Broner matapos itong hatulan ng korte sa kasong contempt.

Ayon sa ulat, nabigo si Broner na bayaran ang mahigit $800,000 sa isang babae na kanyang sinaktan sa isang nightclub noong 2018.

Sinabi ni Judge Nancy Margaret Russo na hindi pinansin ni Broner ang ibinigay ng korte na deadlines at extensions sa pagbabayad sa biktima.

Sa kabila ng kanyang pagbalewala sa hatol ng korte, nakuha pa ni Broner na ipagyabang sa social media ang kanyang pera na nangangahulugan na kakayahan itong magbayad.

Hindi umano makakawala sa kulungan si Broner hanggang hindi nito naibibigay ang valid reason sa kakayahan nitong magbayad, ayon kay Russo.

Matatandaang huling lumaban ang 31-anyos na si Broner ng talunin ito ni Filipino boxer Manny Pacquiao noong 2019.

Hawak nito ang record na 33 panalo, apat na talo at isang draw na mayroong 24 knockouts.