COVID-19 positivity rate sa NCR lalo pang tumaas

LALO pang tumaas ang COVID-19 positivity rate sa National Capital Region (NCR) nang maitala ito sa 10.9% nitong Hulyo 9 mula sa 8.3% nitong Hulyo 2 lamang, ayon sa OCTA Research Group.

Ang positivity rate ay porsyento ng tao na nagpositibo sa virus mula sa kabuuang bilang ng sumalang sa COVID-19 test.

Sa pag-aanalisa sa datos, sinabi ni OCTA fellow Dr. Guido David ang lalawigan ng Aklan ang nakapagtala ng pinakamataas na positivity rate sa 26.9% mula 21% ng sinundang linggo

Ang iba pang lugar na lumagpas na sa 5% benchmark ng World Health Organization ay ang mga lalawigan ng Antique, Bataan, Batangas, Benguet, Bulacan, Capiz, Cavite, Cebu, Iloilo, ­Isabela, Laguna, Nueva Ecija, Pampanga, Pangasinan, Rizal, at Tarlac.

Sa kabila nito, bumaba naman ang reproduction rate sa NCR na nasa 1.49 ngayon mula sa dating 1.6 noong nakaraang linggo.

Ang reproduction number ang tumutukoy sa bilang ng tao na nahahawa ng isang indibidwal na may COVID-19 infection.  Kapag bumaba sa 1 ang reproduction number, nangangahulugan na nakokontrol at bumababa na ang reproduksyon ng virus.

Nananatili rin na mababa ang healthcare utilization rate (HCUR) sa NCR na nasa 28.4%, na tinitingnan ng mga eksperto na maganda pa ring indicators.

“Actually hindi lang sa NCR. Pati the rest of the Philippines. Karamihan ng areas ay below 50% naman ‘yung hospital utilization and ito ‘yung metric na pinakabinabantayan natin,” saad ni David.

Inaasahan ng OCTA na maaabot ang peak na 2,000 kaso kada araw sa kalagitnaan o hulihan ng Hulyo ngunit hindi na lalagpas sa 50% ang HCUR ng NCR.

Nitong Linggo, nakapagtala ang Pilipinas ng 2,018 bagong kaso ng COVID-19, ang pinakamataas sa loob ng limang buwan.  Nasa 13,818 naman ang aktibong kaso sa bansa. (Daris Jose)