Comelec nanawagan: Magparehistro na bago Enero 31

MULING umapela ang Commission on Elections (Comelec) sa publiko na gawin ang lahat ng magagamit na paraan para makapagparehistro para sa barangay at Sangguniang Kabataan (SK) elections sa Oktubre ng taong ito, sa isang linggong nalalabi ng voter’s registration.

Ani Comelec spokesman Rex Laudiangco, ng mga kwalipikadong botante ay maari namang magpatala sa mga Re­gister Anywhere Projects (RAP) booths at iwasan ang pagmamadali dahil hindi nila nakikita ang pa­ngangailangang palawigin ang petsa ng pagpaparehistro ng botante sa Enero 31.

Nagsimula ang registration para sa barangay at SK polls noong Disyembre 12, 2022 at magtatapos sa Enero 31, 2023.

Umaasa ang Comelec na maaabot ang target na karagdagang 1.5 milyong voter registrants para sa halalan sa Oktubre.

Hanggang nitong Ene­ro 20, umabot na sa higit 1 milyon ang nakapagpa-rehistro sa bansa.