‘Byahe ni Kiko’ umarangkada, solusyon sa gutom at mataas na presyo ng pagkain

UMARANGKADA na noong linggo ang “Byahe ni Kiko: Hello Pagkain, Goodbye Gutom” caravan ni Senador Francis “Kiko” Pangilinan, kung saan bitbit nila ang seguridad sa pagkain ng mga Pilipino bilang mahalagang isyu sa halalan sa Mayo.

Sa pagtakbo niya bilang bise presidente, iginiit ni Pangilinan na ang isyu ng pagkain ay dapat nasa plato ng bawat kandidato, at hindi dapat ituring na simpleng kuwento dahil mahigit kalahati ng populasyon ay apek­tado nito.

Bilang isang magsasaka, sinabi ni Pangilinan na ang eleksiyon ay hindi lang dapat nakatuon sa mga kandidato kundi pati na rin sa kanilang agenda at sa direksiyon kung saan nila dadalhin ang bansa.

Dadalhin si Pangilinan ng Byahe ni Kiko van sa mga siyudad at lalawigan sa iba’t ibang bahagi ng bansa upang makipagpulong at makinig sa iba’t ibang sektor, kabilang ang mga magsasaka, mangingisda, estudyante, micro at small entrepreneurs, professionals, at manggagawa.

Sinabi ng kandidato sa pagkabise presidente na dapat pakinggan ang boses ng mga sektor dahil magiging mahalagang bahagi sila ng solusyon sa kanilang mga problema.