BINATANG HELPER, TODAS SA DATING KAALITAN

PATAY ang isang 50-anyos na helper nang pagsasaksakin ng dati nitong kaalitan nang nag-krus ang kanilang landas sa isang eskinita sa Tondo, Manila Martes ng hapon.

Hindi na umabot ng buhay sa Gat Andres Bonifacio Medical Center ang biktimang si Ronnie Alcoriza Y Escurel ng 368 Padre Rada St., Brgy. 26, Tondo, Manila dahil sa tinamong mga saksak sa katawan  habang ang suspek ay kinilalang si Gerald Garcia y Dasmariñas , binata, nasa wastong edad ng 931 Int. 3, Asuncion Cor. St. Mary Streets, Brgy. 13, Tondo, Manila na kasalukuyang pinaghahanap ng pulisya.

Sa ulat ni  PSMSgt  Jansen Rey San Pedro, ng Manila Police District (MPD)-homicide section, dakong alas-12:40 kamakalawa ng hapon nang naganap ang insidente  nang nakasalubong ang dalawa  sa isang eskinita sa  Bartolome St., Brgy 13, Tondo, Manila at walang sabi-sabing pinagsasaksak ng suspek ang biktima.

Nabatid na may matagal nang alitan ang dalawa kaya nang nag-krus ng landas nila ay dito na isinagawa ang paghihiganti ng suspek.

Matapos ang pananaksak ay mabilis na tumakas ang suspek dala ang ginamit na patalim. (GENE ADSUARA )