Binata tinodas sa loob ng bilyaran

Dedbol ang isang binata matapos pagbabarilin ng isa sa dalawang hindi kilalang mga suspek sa loob ng bilyaran sa Malabon city, Huwebes ng gabi.

Dead on arrival sa Ospital ng Malabon sanhi ng tinamong tama ng bala sa ulo ang biktimang si Ace Bade alyas “Love”, 37 ng 175 Samaton C. Perez St. Brgy. Tonsuya.

Sa report nina PSMS Darwin Concepcion at PSSg Diego Ngippol kay Malabon police chief Col. Angela Rejano, dakong 9:55 ng gabi nang maganap ang insidente sa loob ng isang Billiard Hall sa 16 C. Perez St. Brgy. Tonsuya.

Batay sa imbestighasyon, nasa loob ng naturang bilyaran ang biktima nang biglang lumapit ang mga suspek at walang sabi-sabing barilin ito ng dalawang beses sa ulo ng gunman na nakasuot ng bonnet, blue/black t-shirt at short habang nagsilbing back-up ang kasama nito.

Matapos ang insidente, parang walang nangyaring naglakad patakas ang mga suspek patungo sa hindi matukoy na direksyon habang isinugod naman ang biktima ng kanyang mga kaanak sa naturang pagamutan.

Patuloy naman ang follow-up imbestogasyon ng pulisya sa posibleng pagkakilanlan at pagkakaaresto sa mga suspek habang inaalam pa ang tunay na motibo sa insidente. (Richard Mesa)