Binata na sangkot sa pagnanakaw, itinumba sa Malabon

TUMIMBUWANG ang duguang katawan ng 20-anyos na binata na umano’y sangkot sa mga pagnanakaw matapos pagbabarilin ng dalawang hindi kilalang suspek sa Malabon City.

Dead-on-the-spot sanhi ang biktimang si alyas Christian, ng Arasity St. Brgy. Tinajeros nang malapitan pagbabarilin ng mga salarin na kapuwa naka-face mask at nakasuot ng bull cap, bago mabilis na naglakad patakas patungo sa isang gas station sa Sisa Street.

Ayon kay Malabon police chief P/Col. Jay Baybayan, dakong alas-3:50 ng Linggo ng hapon nang mangyari ang insidente habang nakaupo ang biktima malapit sa kanilang tirahan nang lapitan ng dalawang armadong lalaki at walang sabi-sabing pinaputukan ng tatlong beses.

Lumabas naman sa imbestigasyon ni P/MSg. Jeric Tindugan, may hawak ng kaso, kilala umanong tirador sa kanilang barangay ang biktima na kamakailan lang ay inireklamo sa kanilang tanggapan bunga ng pagnanakaw ng bisikleta.

Ayon kay Tindugan, may kaso pang nakabimbin ang biktima na may kaugnayan din sa pagnanakaw kaya isa ito sa sinisilip nilang motibo sa pamamaslang.