Beach house nila sa Zambales puwede nang pagkakitaan: ZEUS, inoperang magsayaw sa gay bar at naging florist sa Dubai si NIKKO

SA pagsusumikap at sipag ng former Hashtag members na sina Nikko Natividad at Zeus Collins, naitayo nila ang kanilang Sunset Serenity Beach House in Zambales.

“Finally, tapos na ‘yung resort namin dito sa Iba, Zambales. Malaki ito kasi ang Airbnb namin kasya ang 18 hanggang 20 na tao. Lahat may higaan ‘yun. Siyempre malaki ang TV para kung manood sila ng Netflix or mag-videoke sila,” post na video pa ni Nikko sa Instagram.

Hindi nga raw naging madali ang buhay para kina Nikko at Zeus bago sila nag-showbiz.

Si Nikko raw marami ang pinasukan na trabaho, kabilang na ang maging OFW sa Dubai bilang florist kahit wala siyang alam a flower arrangement.

“Marami akong napagdaang work noon bilang waiter at wedding coordinator.

Naglinis din ako noon ng mga jeep at nagtrabaho rin sa salon. Plantsa, blower, ayon. Muntik akong turuan maggupit.

“Ang mindset ko dati, basta ‘pag nakapag-abroad, gaganda buhay. ‘Di ba laging ganiyan noon? Basta makapunta lang ako, um-oo ako kahit wala akong alam sa ginagawa ko!” tawa pa niya.

Si Zeus naman daw ay mahilig na sa pagsasayaw mula pa pagkabata. Hindi naman daw niya tinanggap noon ang offer na magsayaw sa mga gay bar.

“Sa sobrang hirap ng buhay namin noon sa Pasay, 15, nagtrabaho na ako. Tumigil ako ng pag-aaral para makatulong na ako sa magulang ko. ‘Yun, dire-diretso na po. Wala na po akong alam na ibang trabaho.

“Dahil matangkad ako at may katawan, may nag-offer na po sa akin sumayaw sa gay bar, pero tumanggi ako. Hindi ko kaya ‘yan. Kasi, siyempre may ibang skills ‘yan eh. Nilaban ko ‘yung talent na meron ako, na marunong akong mag-breakdance, mag-hiphop.”

(RUEL J. MENDOZA)