Batas na magbibigay ng emergency powers kay PBBM para suspendihin ang excise tax sa fuel, pirmado na

PINIRMAHAN na ni Pangulong Ferdinand R. Marcos Jr. ang Republic Act (RA) No. 12316 na nagbibigay sa Pangulo ng emergency powers na suspendihin o bawasan ang excise tax sa mga produktong petrolyo.
Ito’y bahagi ng mga hakbang ng pamahalaan upang mapagaan ang epekto ng pagtaas ng presyo ng langis sa mga Pilipino.
Sa kabilang dako, sinimulan na ng gobyerno ang pag-roll out ng fuel subsidies sa public transport operators, mga magsasaka, mangingisda para makatulong sa pag-offset ng mas mataas na halaga ng fuel.
Idagdag pa rito, bilyong piso ang naka-mobilized para patatagin ang suplay at presyo kabilang na ang P20 billion na hinugot mula sa Malampaya Gas Fund.
Nauna rito, idineklara ni Pangulong Ferdinand R. Marcos Jr., araw ng Martes, Marso 24, ang state of national energy emergency, at iniutos ang pagpapatupad ng Unified Package for Livelihoods, Industry, Food, and Transport (UPLIFT) para sa mga apektadong sektor.
Kasunod ito ng paglagda ni Pangulong Marcos sa Executive Order No. 110 na nagdedeklara ng state of national energy emergency, nagpapatupad ng UPLIFT, at paganahin ang whole-of-government response para matiyak ang katatagan ng suplay ng enerhiya, suportahan ang mahahalagang sektor tulad ng transportasyon, agrikultura, at MSMEs, at maprotektahan ang mga Pilipino sa gitna ng problema sa pandaigdigang suplay ng langis.
Ayon sa EO, ang UPLIFT ay nagsisilbing balangkas ng organisadong pagtugon ng gobyerno, na binubuo ng mga hakbang sa pamamahala ng suplay ng enerhiya na ipatutupad ng Department of Energy, at mga kaakibat na ahensya, at mga karagdagang hakbang upang suportahan ang mga konsyumer at apektadong sektor.
Samantala, sinabi ni Pangulong Marcos na ang deklarasyon ay naglalayong bigyan ang gobyerno ng mas maraming opsyon “should the need arise.”
“Nothing is off the table. We are looking at everything, everything that we can do. And so whatever suggestion that has been brought to us, whatever idea that has, that we have come up with. We are examining it very, very closely in great detail to see if it is going to be advantageous to our people,” ang sinabi ni Pangulong Marcos.
(Daris Jose)