Bagyong Paeng magpapa-ulan sa Undas

INAASAHAN  na magpapa-ulan sa panahon ng Undas ang bagyong Paeng na nasa bansa na ngayon.

Kahapon alas-11 ng umaga, si Paeng ay huling namataan sa layong 540 kilometro silangan ng Borongan City, Eastern Samar at kumikilos pakanluran timog silangan sa bilis na 10 km bawat oras.

Taglay ni Paeng ang lakas ng hangin na umaabot sa 65 km at bugso na aabot sa 80 km bawat oras.

Bunsod nito, nakataas ang Signal number 1 sa ilang lugar sa Luzon at Visayas.

Ngayong Biyernes ay makakaranas ng katamtaman hanggang sa malakas na pag-ulan sa buong Bicol Region at Eastern Visayas.

Dahil sa Shear Line at trough ni Bagyong Paeng, malakas na pag-ulan ang mararanasan sa Visayas, Southern Luzon, at northern portion ng Mindanao.

Sa Sabado, si Paeng ay lalapit sa Catanduanes at inaasahan na magla-landfall sa Linggo sa baybayin ng eastern portions ng Central Luzon o Cagayan Valley.

Sa susunod na 24 oras, maaabot ni Paeng ang severe tropical storm category at lalakas pa sa Sabado. (Daris Jose)