BAGONG BUSINESS PERMIT, TUMAAS NG 40% ANG PAGPROSESO SA MAYNILA

TUMAAS ng 40% ang pagpoproseso ng bagong business permits kasabay ng malakas na renewal activity na nagpapakita ng matatag na negosyo sa lungsod.

Iniulat ito ni Bureau of Permits Director Levi Facundo kay Manila City Mayor Francisco “Isko” Moreno Domagoso.

Hanggang Enero 25, 2026, nakaproseso ang lungsod ng 384 bagong business permits, mas mataas mula sa 176 noong parehong petsa noong nakaraang taon.

Sa kabuuan, 159 bagong permits ang bayad na at tumutugma sa bilang ng bayad noong nakaraang taon kahit mas maraming aplikasyon ngayon.

Samantala, nakaproseso ang Maynila ng 45,261 business permit renewals, kung saan 37,484 ang bayad na, na may compliance rate na halos 82–83% sa maagang bahagi ng renewal cycle.

“That’s about 82%, Yes, actually almost 83% po, Mayor.” ani Facundo.

Pinalawig ng lungsod ang renewal period hanggang Pebrero 13, 2026, nang walang interest, penalty, o surcharge, ayon kay City Treasurer Atty. Paul Vega, upang bigyan ng sapat na oras ang mga negosyante na mag-renew ng kanilang permits.

Ayon kay Domagoso, ang datos ay patunay ng tiwala ng publiko sa sistema ng City Hall. (Gene Adsuara)