Bading na-depressed sa utang, nagbigti

NASAWI ang isang 23-anyos na bading na dumanas umano ng depresyon matapos magbigti dahil sa hindi nabayarang utang sa Malabon City, kahapon (Huwebes) ng madaling araw.

Kinilala ang biktima na si Mark Lester Jhon Dela Cruz, salesman, na nadiskubreng walang buhay ng kanyang tiyahin na si Ailane Bacalso habang nakabigti gamit ang kumot na nakapulupot sa kanyang leeg samantala ang dulo ay nakatali sa kisame bandang ala-1:30 ng madaling araw sa loob ng kanilang bahay sa 18 Kaunlaran St., Brgy. Muzon.
Ayon kay Malabon police homicide investigator P/MSgt. Julius Mabasa, bago ang insidente ay tinawagan ng biktima ang kanyang nakatatandang kapatid na babae at sinabing nahihiya siya at napahiya sa mga tao na humahabol sa kanya dahil sa hindi niya nabayarang utang.

Gayunman, natagpuan ng tiyahin ng biktima ang listahan ng utang ng kanyang pamangkin at napag-alaman na mayroon lamang siyang utang na P1,000.00.

May hinala rin si Bacalso na ang kanyang pamangkin ay nakipag-break umano sa kanyang kasintahan na naging sanhi ng kanyang pagkalungkot. (Richard Mesa)